"Қарағанды – Семей – Қарағанды" бағытында әуе рейсі ашылды

• 24.09.2025 12:00

Семейден еліміздің ірі қалаларына қатынайтын әуе рейстерінің саны артып келеді.

Жолаушыларды сыйымдылығы 50 орындық " Bombardier CRJ200" ұшағы тасымалдай бастады. Субсидияланған рейсті " SCAT " әуе компаниясы жүзеге асырады. Жолаушылар аптасына 2 рет – сейсенбі және бейсенбі күндері қатынайтын болады. Билет бағасы – 15 000 теңге. Жаңа бағыттың ашылуы тұрғындарға қолайлы әрі қолжетімді бағада сапарлауға мүмкіндік береді.

"Бірнеше жыл бұрын "Қарағанды-Семей" бағытындағы әуе қатынасы жабылып қалған болатын. Қайтадан ашылғанына өте қуаныштымыз. Семейден Қарағандыға келу үшін Астана арқылы пойызбен жүретінбіз. Қазір халыққа өте ыңғайлы. Бір жарым сағат шамасында Семейге жетіп аламыз", — деді Қарағанды қаласының тұрғыны.

Қазіргі уақытта Семей қаласынан "Семей – Алматы", "Семей – Астана", "Семей – Үржар", "Семей – Қарағанды" бағыттары бойынша әуе рейстері орындалуда. Аталған рейстерді "FlyArystan", "Оңтүстік аспаны", "SCAT" әуе компаниялары жүзеге асырып келеді. Айта кетейік, республикалық бюджеттен субсидияланатын жаңа бағыт Қазақстан Республикасы Көлік министрлігінің Азаматтық авиация комитетінің және Абай облысы әкімдігінің қолдауымен ашылып отыр.

Сурет: Абай облысы әкімінің баспасөз қызметі